مراد مكرم لـ شريف مدكور: ابن ناس وعينة مليانة

عَبر الفنان مراد مكرم، عن سعادته بحضور حفل عيد ميلاد الإعلامي شريف مدكور.

ومن خلال منشور طرحه عبر حسابه على “فيس بوك”، أشاد بتفاصيل الحفل، حيث كتب: “يعني ايه حد محبوب، يعني يعزم 100 فرد يجيله أكتر، يعني اللي ربنا بيحبه يحبب فيه خلقه، يعني ناس تسوق بالساعات علشان تروحله عيد ميلاده، وناس تأجل سفر وناس تيجي من سفر علشانه.

نرشح لك: بمناسبة عيد ميلاده.. شريف مدكور يتبرع بقيمة هداياه لمستشفى أهل مصر

طيب يعني ايه واحد ابن ناس وعينه مليانه؟ يعني بدل ما يستنى 100 هدية في عيد ميلاده أو أكثر، يجيب مستشفى أهل مصر لمعالجة الحروق ويطلب من كل أصحابه ما يجيبوش هدايا وتمن الهدايا دي يتبرعوا بيه للمستشفى، فـ يلم للمستشفى فوق الـ ١٢٠ ألف جنيه.. كل ده وهو لا ذو سلطة مثلا أو مال وفير، حد مستور وعينه مليانه.

إنما أنا بشكره علشان حاجة تانية خالص، أنا لحد ما رحتله امبارح وشوفت ناس ما شفتهاش من سنين أو شهور وقعدت مع ناس عشرة عمري، مكنتش عارف أفرح، حاولت بس ما عرفتش لحد امبارح، فرحت من قلبي.. ربنا يباركلك في حياتك كلها يا شريف يابن الأصول وكل سنة وانت في ستر وصحة وراحة بال يا صديقي.

يشار إلى أن شريف مدكور، كان قد احتفل مساء أمس السبت بعيد ميلاه الـ 50، وسط نخبة كبيرة من المشاهير.

ونشر “مدكور” عبر حسابه على “فيس بوك” منشورا أوضح من خلاله أنه تبرع بقيمة هداياه لمستشفى أهل مصر، حيث كتب: “النهاردة كان عيد ميلادي الخمسين عملت حفلة في بيتي وعزمت حبايبي وطبعا عيد ميلاد يعني هتجيلي هدايا بس أنا فكرت إن الهدية تبقى حاجة تانية خالص، فكرت إن الهدية تروح لمستشفى أهل مصر لعلاج الحروق، واتفقت مع ضيوفي إنهم يتبرعوا للمستشفى بقيمة الهدية اللي كانوا هيجيبوهالي فالناس بتوع المستشفى بقوا واقفين على مدخل البيت بياخدوا التبرعات من الناس، والنتيجة كانت 120 ألف جنيه تقريبا اتجمعوا لصالح مستشفى أهل مصر، أنا مبسوط، وشكرا لكل حبايبي اللي شرفوني ونوروني وأدوني هدية حلوة لصالح مستشفى بترجع الابتسامة على وشوش الناس“.