سميحة أيوب عن مهرجان القاهرة للدراما: الدراما غلبانة وملهاش أب ودلوقتي لاقيناه

أعربت الفنانة القديرة سميحة أيوب، عن سعادتها بتكريم مهرجان القاهرة للدراما، لعدد من صُناع الدراما لعام 2022، مشيدة بتعاون القائمين على المهرجان مع نقابة المهن التمثيلية.

وقالت أيوب، خلال لقائها مع dmc، على هامش فعاليات حفل افتتاح مهرجان القاهرة للدراما: أنا سعيدة جدًا ومكنتش أتخيل إنِ المهرجان يكون بالعظمة دي، ومهما كنت أتخيل مكنش الواقع ده، فأنا سعيدة جدًا إن النقابة عاملة المهرجان ده والمتحدة محتضناه لأننا فقدنا مهرجان التليفزيون متوقف بقاله كتير، والدراما غلبانة وملهاش أب ودلوقتي لقينا ليها أب.

مهرجان القاهرة للدراما

وأضافت الفنانة القديرة: التكريم في المهرجان ده له طعم تاني خالص ومذاق آخر، غير المهرجانات اللي بتتعمل علشان الناس تدخل فيها ويحتفلوا بيهم، لكن كون الدولة تعمل ده والنقابة تبادر بهذا فأنا سعيدة جدًا، المهرجانات دي بتعمل نوع من المنافسة الشريفة، كل واحد عايز يبقى أحسن، ده بيمهد الطريق للمواهب إنها تفكر زي زمان، وهيتعبوا بالساعات علشان يتفوقوا وده شيء هايل.

وكشفت سميحة أيوب، عن أصعب أعمالها الفنية قائلة: مفيش مشهد يتنسي، كل مشهد عايز تديله حقه، المسرحية اللي كنت خايفة وتعبت فيها هي مسرحية فيدرا، وخُفت لما رُحت باريس وعرضنا هناك، وفرقة مسرحية بتاعت الدولة بتعمل مسرحية لـ راسين، وراسين ده من كلاسيكيات فرنسا، يعني إحنا في عقر دارهم وبنعمل شغلهم، فكانوا مش متخيلين إننا هنكون كده.

وتابعت: أي فرقة وافدة لباريس بتعرض ليلة أو ليلتين، لكن إحنا عرضنا 15 يوما، وجالنا جوابات نقد ذاتي، إن ناس بيقولوا إنهم غلطانين إنهم قالوا إن عندنا جرأة نعمل راسين واللغة العربية دي عاملة زي الأوبرا.