رواية اواب خديجة اواب وخديجه الفصل التاسع 9 بقلم ايه ابو سالم

-"لأ،هو الأكيد إنّ كده مش هينفع،إنتَ هتيجي مش هتطلع أصلاً."

-قولتها وأنا واقفه قدامه وهو بيظبط هدومه قبل ما ينزل.

-"لأ معلش مش فاهم!يعني إيه مش هطلع؟هتمنع من شقتي ولّا إيه."

-رفع حاجبه وهو بيبصلي وبيفهم أنا عاوزه إيه.

-"آه،علشان لو طلعت هتكسِّل والمشوار هيتلغي ومش هننزل،افضل واقف تحت في الشارع،ولو على شغل المكتب ف أنا اللي هكلم عُمير أقوله يعمل كل اللي إنتَ عاوزه هناك،ها إيه رأيك."

-"فلنفترض إنِّي وافقت على العبث ده،وعملت نفسي مش واخد بالي من النبرة دي،المفروض هنروح فين،ومشوار إيه ده."

-حسيت إنه بدأ يقتنع،تلقائي طريقتي اتغيرت وبدأت أوصف قدامه وأنا مبسوطه.

-"ماشي،هو عبث،استحمل معلش،المكان حلو وكمان هيعجبك،خليه مفاجئة بقا،مش إنتَ دايماً بتوديني أماكن على ذوقك إنتَ."

-كان بدأ يبتسم على طريقتي وده كان أكبر مؤشر إنه هيوافق خلاص.

-"بس ده ميمنعش إنِّي كده كده هعرف المكان علشان أنا اللي هسوق و.."

-قاطعته وأنا بتكلم بحماس وبوضح أكتر وجهة نظري.

-"لأ،مش شرط،أنا معايا اللوكيشن بتاعه،وإنتَ هتوعدني واحنا رايحين إنّك مش هتدور ولا تعرف حاجه عنه لحد لما نروح المكان هناك،مش إنتَ كُلّ مرة بتعمل كل حاجه علشان تفرحني خليني أنا أعمل حاجه المرة دي علشان أفرحك."

-سكت شويه فكر.

-"المرة دي بس يا خديجة الأمور هتتم بالشكل ده،علشان فعلاً بقالنا فترة بنخرج من ده ندخل على ده ومحتاجين نفصل،وكمان نشوف ذوق القطقوطه والأماكن اللي بتحبها."

-العلاقات علشان تتم لازم احنا الاتنين نبذل فيها زي بعض يعني زي ما إنتَ أوقات هتيجي على نفسك وشغلك وحياتك وأهلك علشاني،أنا كمان أوقات هاجي على نفسي وحياتي وأهلي،هي مش مسابقة تضحيات بس في نفس الوقت مش مستبقة عناد،العناد لما بيدخل في أي حاجه بيفسدها والأكيد إني مش هكون حابه أفسد علاقتنا.

-"متكلميش أخوكِ في موضوع المكتب،أنا هظبط الدنيا متشغليش بالك،ولو احتاجتي حاجه اتصلي بيا،هنزل علشان متأخرش."

___________________________________________

-"اطلع طيب شيل الحاجات دي نزِّلها،واعمل نفسك مش واخد بالك."

-سمعت صوته وهو بيضحك

-"لأ إزاي بس ده أنا واخد تحذير شديد اللهجه من قبل ما انزل إني أخلّص الشغل واستنى تحت البيت،أصل لو طلعت كل حاجه هتتلغي."

-"حصل خير يا غالي،اطلع يلَّا."

-مكننش كملت كلام لقيته بيفتح الباب وانا واقفه ماسكه التليفون بكلمه وبضحك على نكشه أصلاً،قفلت التليفون.

-"زوج صالح والله،أنا اختارت صح."

-ضحك وبدأ يشيل الحاجه. من على السفره.

-"دلوقتي زوج صالح،والصبح كنتي عاوزه تنكدي على زوجك الصالح،يلا يا قطقوطه علشان نلحق قبل الزحمه،اقفلي وتعالي."

-"خلاص بقا،هرمونات صباحيه كده تدّي طعم لليوم،أنا مبسوطه أوي،وإن شاء الله اليوم هيبقى سكر."

__________________________________________

-"جيباني تبيعيني أعضاء يا خديجة ولا إيه،إيه المكان الهوس هوس ده،عرفتيه منين أصلاً."

-كنا خلاص وصلنا المكان اللي اختارته،مكان هادي جميل،كله عشب،على منحدر،مفيهوش دوشه،بالظبط زي ما بحب.

-"تعالى بس ننزل،أنا جيت هنا كذا مره قبل كده مع عُمير وإنت هتحب المكان أوي،هتروح وإنت حاسس إن الدنيا دي مفيهاش هموم أو مشاكل أو تعب تاني أبداً."

-"ده كفايه تفكيرك إنك تخرجيني من دوامة الشغل والحياة دي والله،يلّا بينا يا قطقوطه."

-بدأنا نجهز المكان علشان نقعد براحتنا ونجهز الأكل ونظبطه في الأطباق على ما المغرب يأذن،وده ميمنعش إن واحده من أهم الحاجات اللي كانت سبب في نجاح جوازنا إن كان في لغة تفاهم بنا يعني بنلاقي حاجه ننكش بعض بيها،نتناقش فيها،نحكي مع بعض عنها.

-"يلّا يلّا كُل علشان نصلّي مع بعض وبعدها نبدأ في الفعاليات اللي مجهزاها."

-"حماسك ده اللي مخليني عاوز أقوم أعمل كل حاجه مره واحده وفي نفس الوقت استمتع بكل حاجه والله."

___________________________________________

-"يمكن متعرفيش حاجه عن الموضوع ده،بس كنت دايماً أفكر إن لما هاجي أتجوز هكون بشخصيه معينه وأسلوب معين وراسم شخصيه كده في دماغي للزوج المثالي والزوجه المثاليه والحياة اللي مفيش منها اتنين."

-"وبعدين إيه اللي حصل،إيه دخلة الندم دي."

-قولتها وأنا باكل حلويات وبقربها منه علشان ياكل هو كمان.

-"مش ندم افهمي، بقولك إن يمكن وجودك إنتِ كخديجة غيّر مليون في الميّه من مخططاتي تماماً،للأحسن طبعاً متبصليش كده."

-ضحكت وأنا بحدفه بعلبة المناديل.

-"لأ إندم يا حبيبي إندم،يمكن اختيار أصلا الانسان اللي إنت هتكمل معاه بيبقى مُتوقف عليه كُل حاجه تانيه في حياتك يعني مثلاً قراراتك قدام،شكل حياتك،تربية أولادك،كُله كُله."

-"ده الحمدلله إن ربنا كرم الواحد والله واختار صح."

متنسوش تتابعوني 

هنا هنودع أواب وخديجة في رمضان معهم بس هيكونوا معانا في حاجات تانيه كتيره جايه وبأشكال أكتر وأحلى وزي ما بتحبوا وأوعدكم إنّها جديده من نوعها زي كل مرّه.

أنا مِنكَ وأنت مِني،وأرجوا الله ألا تَنقضِيَ رحلتك عني♡゙

تمت بحمدلله