رواية التفكير الصحيح من الفصل الاول للاخير بقلم اسراء ابراهيم

وصل خالد عند بيت أهل مراته، وخبط عالباب وواقف متعصب لقى مراته اللي فتحتله شدها من إيدها من غير ولا كلمة ونزل بيها من البيت

ضحى بصدمة من اللي عمله قالت وهي ماشية وراه: إيه يا خالد أنت ماسكني وبتجرني كدا ليه؟

خالد بدون ما يبص لها وعصبية: مش عايز ولا كلمة لغاية ما نوصل البيت

عند أهل ضحى كانت والدتها طالعة من المطبخ وشافت اللي حصل ومالحقتش تتكلم ولا تعمل ردة فعل

جريت تنادي على جوزها وقالتله اللي حصل قال بغضب: هو اتجنن عشان ياخدها بالطريقة دي من البيت، يلا البسي حاجة بسرعة خلينا نروح نشوف إيه اللي هبل اللي بيعمله دا

كان خالد وضحى وصلوا البيت وفتح الباب لقى حاتم داخل من البلكونة بعد لما شافهم طالعين وهو ماسكها من إيدها ومتعصب

حاتم بابتسامة قال: برافو عليك يا خالد وريها مقامها وهات حقي منها على الكلام اللي قالته ليا

ضحى بدموع رايحة تتكلم: يا خالد أنا

وقفها خالد لما قال: اسكتي يا ضحى

كان والدته واقفة هي كمان ومبسوطة بسبب اللي بيحصل ومستنة تشوف خالد هيعمل فيها إيه 

الباب كان مفتوح ودخلوا أهل ضحى بنرفوة وعصبية

قال خالد لوالد ضحى: أنا آسف على الطريقة اللي خدت بيها ضحى من عندكم بس حقيقي تصرفها عصبني 

ضحى بدموع: يا خالد اسمعني

خالد: اسمعي أنتِ يا ضحى، لما أمي طردتك بلبس البيت ماكنش لازم تمشي بيه كدا أنا عارف إنها عباية محترمة وطرحة طويلة بس أنا مابحبش تنزلي بيه كدا وكمان بالشبشب كان المفروض تقعدي عالسلم حتى لغاية ما أجي

أنتِ طبعا عارفة إني دايما مع الحق وكنت هقف معك طالما أنتِ على صواب، خلينا بقى في الموضوع اللي حصل

دخل والد خالد هو كمان وشافهم متجمعين ووقف مستغرب يشوف في إيه

بقلم إسراء إبراهيم عبدالله

خالد بعصبية قال: أنت يا حاتم يا محترم طالما لقيت مرات أخوك لوحدها يبقى تخلي عندك رجولة ودم وتنزل من البيت حتى لو هتقعد في الشارع

قاطعته والدته بعصبية وقالت: يسيب بيته ويقعد في الشارع ليه يا خالد هو غريب ولا إيه؟ يعني الواحد جاي من شغله عشان يرتاح في بيته ويقوم عشان خاطر الهانم ووساوس في دماغكوا

خالد بعصبية: ربنا أمرنا بكدا يا أمي ودا لمصلحتنا على فكرة إزاي واحد أجنبي عنها يقعد معها وهي تحل له

إيه يا أمي هتنسي اللي ربنا ورسولنا أمرنا بيه؟!

وكمان الناس لما تاخد بالها إنها هي اللي في البيت والأستاذ معها هيقولوا إيه، بس أنا يهمني إن دا حرام ومستحيل أخليه يحصل لو حتى هيزعل مني

وحاجة كمان إزاي تطردي مراتي من بيتها ها؟ أنا اللي مسؤول عنها أنا اللي أقول لها تقعد هنا أو لأ وأقولها تعمل إيه وماتعملش

يعني لو عملت غلط أنا اللي اتصرف معها لأنها مسؤولة مني وأنا مسؤول عن بيتي واللي بيحصل فيه واللي عايزه يكون فيه ويتعمل فيه

لكن تطرديها كدا من غير ما ترجعيلي دا اللي يعصبني وكمان هي مش غلطانة

والده: أنا كدا فهمت اللي حصل، وبص لابن أخوه ومراته وقال: أنتم غلط واللي حصل دا مش هيعدي بالساهل

والدة خالد: في إيه يا خالد أنت بتزعقلي عشان مراتك هي حطتك حاتم في صباعها ولا إيه؟ ولا عملتلك إيه لما تقف قصاد أمك عشانها

خالد: أنا بقف مع الحق يا أمي وأنتِ عارفه كدا كويس، ومراتي دي مش حد غريب دي شريكة حياتي زي ما أنتِ أمي وماينفعش أزعلك نفس النظام بعمله مع ضحى أنا مش جايبها من الشارع أنا جايبها من بيت محترم ولازم أحافظ عليها وأكون سندها زي ما أنتِ ليكي حقوق عليا هي ليها نفس النظام وأنا مابظلمش حد

وأنا مش أقبل اللي حصل في مراتي دا لأني متعصب أوي من اللي حصل ومش عارف أعمل حاجة لأنك أمي بردوا

بس هكتفي بحاجة واحدة عشان كلنا نرتاح وأرد لمراتي كرامتها بردوا وعشان حاتم كمان يبقى يتجاوز حدوده أصل أنا عارف مهما أقول وأنصح مش هيدخل دماغكم

محدش من أهلها قال حاجة واقفين بيسمعوا اللي بيتقال ويشوفوا هيوصلوا لإيه

خد خالد تنهيدة وقال: أنا ومراتي هننعزل يعني بعد كدا اللي عايز ياكل ويرتاح يبقى تحت مش هنا في شقتي لأن بردوا راحة مراتي تهمني يعني مابقتش هيصة هي اللي عايز ياكل ويرتاح يبقى يطلع عندي هنا ويزعل مراتي

والدته بصدمة وعصبية: أنت اتجننت دا كله عشانها عايز تنعزل؟