وجه الفنان حلمي عبدالباقي، وكيل أول نقابة المهن الموسيقية رسالة حادة إلى الفنان مصطفى كامل، نقيب المهن الموسيقية، مستنكرا فيها أيقافه عن العمل دون أسباب واضحة.
وقال حلمي عبدالباقي من خلال فيديو نشره عبر حسابه الشخصي بموقع التواصل الاجتماعي “فيسبوك”: أنا بقالي فترة ملتزم الصمت تمامًا ومبتكلمش في أي حاجة مع إني شايف حملة ممنهجة لتشويهي وبقول بكرة الحق يبان، سكت كتير وتحملت ما لا يتحمله بشر، وبشوف وبسمع التشويهات اللي عمري ما أتخيل إنها تتقال عن حلمي عبد الباقي، ولكن ده اللي حصل، عايز أقول إن المخالفات العلاجية اللي عندي حولوها على جهاز الكسب الغير مشروع.
وأضاف: موضوع غريب جدًا وعلى حد علمي لو حد خبير في القانون يقولي إن جهاز الكسب الغير مشروع بيروحه الحرامي والمرتشي واللي بيتكسب من كرسيه ويتربح من تحت لتحت، إنما واحد تجاوزات علاجية بتروح للمستشفيات مبمدش إيدي على حاجة علشان أتربح منها، ومع ذلك امتثلت أمام اللجنة الموقرة في التحقيق وهما هيكتبوا تقريرهم قريب.
وتابع: في الجلسة الأخيرة شوفت تعنت غريب جدًا، أول ما قعدنا قالوا في مطالبة من مستشفى لسه جيالنا بأن في جواب أنت عامل له إعفاء لواحدة هتعمل عملية في عينها وأنت عامل لها إعفاء والجواب ده جالنا من أيام، أيام إيه الجواب ده من شهر 11 سنة 2024، يعني كلام غريب جدًا والمستشفى مبعتتش المطالبة من سنة و4 شهور. ، لأ هو الموضوع دوروا لـ حلمي على أي مصيبة تاخده، ومع ذلك أنا افتكرت كويس جدًا الجواب ده كنت اتكلمت مع النقيب وشخص كمان واتكلمنا والنقيب قالي الست دي غلبانة ونساعدها وعملت الجواب، ولما عملنا اطلاع على المخالفات. الجواب ده مكنش موجود أصلًا، طالع دلوقتي بـ أمارة إيه. ، وحصل إنكار ومش عايزين يكلموا الشخص اللي كان معانا في المكالمة.
كما وجه رسالته إلى نقيب المهن الموسيقية، قائلا: في إقصاء لـ حلمي عبد الباقي إنه ميدخلش انتخابات سواء عضو مجلس أو يرشح نفسه نقيب وده حق شرعي لأي حد، وأنا تم إيقافي من أكتر من 3 شهور بأني ممارسش مهامي النقابية دون أن يثبت عليا أي إدانة، هو أنا موظف، أنا عضو مجلس لما تثبت إداتني وقفني أو اشطبني من النقابة، أنت موقفني ليه بقالك 3 شهور، هو ده قانون.
واختتم: أنا مطلوب إقصائي من الانتخابات اللي جاية لا عضو مجلس ولا نقيب، أنا بتعرض لـ ظلم وقهر بشكل غير طبيعي ولكن بقول اللي ربنا عايزه هو اللي هيكون.
أزمة حلمي عبدالباقي مع النقابة
وفي وقت سابق، كان حلمي عبدالباقي قد علق على قرار تحويله للتحقيق هو وسكرتير نقابة المهن الموسيقية، بقرار من النقيب مصطفى كامل.
وقال حلمي عبدالباقي في فيديو عبر حسابه الشخصي فيسبوك: أخواني وأخواتي أعضاء الجمعية العمومية، كنت متواجد في النقابة يومي الأحد والإثنين، ويوم الإثنين فوجئت إنني متحول للتحقيق، وأنا مش عارف ليه لكن كل كلمة قولتها في الفيديو اللي فات كانت صادقة ومعايا ما يثبت إنني كنت صادق وكل الناس على علم بما قولته.
وأضاف: أنا كنت طلبت من السيد النقيب العام إنه يحلف على المصحف ويقول إني كنت بكذب في أي كلمة كل ما فعلته أنني كنت أدافع عن نفسي وكرامتي اللي اتهانت من خلال الفيديو المسرب، والقانون بيقول إني أتشال من خلال الجمعية العمومية الغير عادية يعني حضراتكم اللي تقولوا حلمي يعقد أو يمشي لكن التحقيق أو الشطب.
وتابع: كل ده ظلم وأنا مش هسكت ومكمل للآخر، وإن شاء الله قريبا جدا هعمل مؤتمر صحفي حتى لو لوحدي، لأن واثق جدا من نفسي ومعي كل ما يثبت كل كلمة قولتها وعايز أقول للجمعية العمومية الغير عادية لما حققوا مع الأستاذ إيمان البحر درويش، وشطبوا اسمه، رجع القضاء الإداري وأخذ حكم ببطلان كل التحقيقات دي وإنه يرجع تاني مكانه ولكن ربنا يشفيه ويعافيه لم ينفذ القرار في النهاية.
وواصل: أنا جاهز جدا وعندي ما يثبت كل كلمة بقولها، وأنا متمسك بحقي ومكمل للآخر أي كانت النتيجة، وأنا مش طمعان في أي حاجة، أكت من إن يثبت براءتي من كل حاجة اتقالت معايا ومعايا اللي يثبت كلامي ومعايا ربنا، وأي حد يعترض يبقى بيزايد وتكميم أفواه وبيتآمر، وأعرف إني أي مخالفة لازم يتاخد موقف.
