روشتة بعد أول كلمة وجعتك من حد بتحبه.. اسمع وجعك قبل ما ترد
كلمة واحدة بس، ممكن تغيّر كل حاجة، تبرد حرارة العلاقة، وتخلّي قلبك يتلخبط، خصوصًا لما تيجي من حد بتحبه وكنت شايفه أمان، وساعتها، بيكون أصعب قرار هو ترد؟ ولا تسكت؟ تبعد؟ ولا تبرر؟
اهدى شوية.. ما تردش فورًا
أول رد فعل طبيعي هو إنك تحس بوجع، وبعدين تفكر ترد بسرعة، بس الحقيقة إن أقوى رد هو اللي بييجي بعد هدوء، خليك في مساحتك، اقعد مع نفسك، خد نفس عميق، وسيب الكلمة تاخد وقتها قبل ما ترد.
خليك في مساحتك.. مش في المعركة
مش لازم تثبت إنك اتجرحت، ولا إنك أقوى، كفاية إنك تبعد لحظة، تبص للموضوع من برة، لأن الرد وانت موجوع ساعات بيزوّد الجرح، مش بيخففه.
اسمع مشاعرك.. مش كلامك
مش مهم تقول إيه، المهم تحس بإيه، اسأل نفسك الكلمة دي جرحتني فعلاً؟ ولا لمست نقطة ضعيفة؟ فيه فرق كبير، واللي بيفهم الفرق بيعرف يقرر بعقله مش بألمه.
روشتة بعد أول كلمة وجعتك من حد بتحبه.. اسمع وجعك قبل ما ترد كلمة وجعتك؟ اسأل نفسك ليه لمستك كده؟أوقات الوجع بيكون مراية لحاجة جواك، شك، نقص، خوف قديم، فقبل ما تلومه، بص جواك، ووقتها بس هتعرف ترد صح.. أو ما تردش خالص.
العلاقات اللي تستاهل بتقدر الصمت زي ما بتقدر الكلام، ودايمًا، اللي بيحبك بجد، هيرجع يسأل أنا جرحتك؟ وساعتها تكون جاهز تجاوب، مش من وجعك، لكن من وعيك. -----
