إزاي تجهز نفسك نفسيًا وروحيًا لعيد الأضحى؟
العيد مش بس لبس جديد وخروجات.. العيد فرحة داخلية وسلام جوا القلب، وعلشان تحس بالمعنى الحقيقي لعيد الأضحى، محتاج تهيأ نفسك قبلها، مش بس بالجسم.. لكن بالنفس والروح كمان.
ابدأ من دلوقتي تراجع علاقتك بربنا، حتى لو بخطوة بسيطة كل يوم، آية واحدة، سجدة صادقة، استغفار قبل النوم، ده بيخلي القلب يروق ويدخل على العيد وهو خفيف مش مثقل بالحزن أو التوهان.
جهز نيتك.. إنك تدخل على العيد بقلب نضيف، حتى لو حصلت مواقف صعبة أو ناس وجعتك، خليك أكبر، سامح علشان ترتاح، مش علشان تنسى، لكن علشان ما يبقاش في حاجة حابسة فرحتك أو مخنوقة جواك.
حاول تقضي الأيام اللي جاية بهدوء، ابعد عن الزحمة النفسية والسوشيال ميديا اللي بتشوش عليك، اقعد مع نفسك شوية، افتكر نِعم ربنا عليك، حتى لو بسيطة، واعرف إن الفرحة الحقيقية مش في كمية الحاجات اللي عندك.. لكن في السلام اللي جواك.
كمان، فكّر في حد ممكن تساعده قبل العيد، ولو بكلمة حلوة أو دعوة صادقة، فرحة العيد بتتضاعف لما تبقى سبب في بسمة على وش حد، والصدقة في الأيام دي ليها طعم مختلف، وكأنك بتجهز لقلبك لبس العيد من جوه.
وفي آخر يوم قبل العيد، اقعد مع نفسك شوية، وافتح صفحة جديدة، مش لازم تكون خالية من الأخطاء.. لكن تكون صافية النية.. ومليانة أمل إن الجاي أحسن، وإن العيد ده بداية حلوة لحاجة أصفى جواك. -----
