دعاء اللقطة الأخيرة.. لما قلبك يسبق لسانك قبل غروب الشمس
في اللحظات الأخيرة من يوم عرفة، بيبدأ الوقت يضيق، والشمس تقرب من المغيب، لكن أبواب السما لسه مفتوحة على وسعها، بتنادي على كل قلب لسه نفسه يتوب، ولسه فيه وجع، ولسه فيه أمل.
اللحظة دي مش عادية، دي لحظة “اللقطة الأخيرة”، اللحظة اللي بتلم فيها كل اللي نفسك تقوله ومقدرتش تقوله طول اليوم. في الحديث الشريف، النبي ﷺ قال: “ما من يومٍ أكثر من أن يُعتق الله فيه عبدًا من النار من يوم عرفة”، فلو لسه ما دعيتش، أو حسيت إنك كنت تايه، اللحظة دي بتردّك للحقيقة: إن كل حاجة لسه ممكن.
دعاء اللقطة الأخيرة.. لما قلبك يسبق لسانك قبل غروب الشمس
ادعي بكل اللي نفسك فيه، ما تحتارشي. الجملة اللي طالعالك دلوقتي من القلب، دي هي المفتاح. مفيش صيغة واحدة مثالية، لكن جرب تقول من قلبك “اللهم ارزقني كل ما أتمنى، واصرف عني ما يؤذيني، وقرّبني ممن تحبهم لي، وقرّب لي ما فيه الخير والرضا يا كريم”
الدعاء مش محتاج فصاحة، محتاج صدق، محتاج دمعة صافية أو حتى تنهيدة من وجع. ناس بتدعي بحلم، وناس بتدعي بكسرة، وناس بتدعي للي راحوا، وناس بتدعي تلاقي نفسها. وكلهم، بيدّعوا لرب كريم قال: “ادعوني أستجب لكم”.
فاكر إنك لو قلت دعوة واحدة من القلب، ربنا يقدر يبدّل بيها قدرك كله؟ متستقلش بنفسك. اللحظة دي مش متكررة، فاستغلها، وابقى افتكر: الدعاء الأخير… ممكن يكون البداية الجديدة.
-----
