بعد المركز الرابع بأمم أفريقيا.. مدحت العدل: منتخب مصر فوق أي مدرب
علّق الكاتب والسيناريست الدكتور مدحت العدل على حصول منتخب مصر على المركز الرابع في كأس الأمم الإفريقية 2025، عقب خسارته أمام نظيره نيجيريا بنتيجة 4-2 بركلات الترجيح، وذلك بعد انتهاء المباراة بالتعادل السلبي. قائلًا: "كلنا زعلانين كمصريين، والنهارده لعبنا قدام نيجيريا ومكناش خايفين، وشكلنا كان كويس مقارنة بالسنغال".
الهجوم على حسام حسنوتابع خلال مداخلة هاتفية مع برنامج "الصورة"، الذي تقدمه الإعلامية لميس الحديدي على شاشة النهار، قائلًا: "أنا هاجمت حسام حسن مش لأني عاوز أدرب منتخب مصر، ولكن أنت مصر، لما تيجي تلاعب فريق زي السنغال ما ينفعش تلعب بهذا الشكل الخايف والمرتعش، وفي الآخر عندك اتنين مهاجمين بيلعبوا في أقوى فرق في العالم، وكلهم في حالة دفاع، ومصطفى محمد هو أفضل مهاجم، وفي الآخر شكلنا وحش".
وواصل مدحت العدل: "مافيش مشكلة نطلع التالت والرابع، المهم نعمل اللي علينا. النهارده اللعيبة عملوا اللي عليهم، وقدموا ماتش كويس قدام نيجيريا، وهم أفضل من السنغال في الأساس. لما لعبنا بجد وصح ومن غير خوف وبدون رعشة، قدمنا ماتش كويس. وبعدين نغمة ما عنديش محترفين وغيره من الكلام ده، ولما خدنا بطولة إفريقيا ثلاث مرات متتالية كان عندنا كام محترف؟ لكن كان فيه سيستم ومدير محترف، كابتن حسن شحاتة شفاه الله، والمدرب كان بيعرف يعامل اللاعبين نفسيًا".
فريق متطوروأردف مدحت العدل: "أنا ما شفتش في فرق إفريقيا دروبا مثلًا، لكن رأينا لعب جماعي جيد. ومع إن لدينا فريق متطور من ناحية المحترفين مقارنة بالسابق، لم يُستغل ذلك جيدًا، وملعبناش بشكل محترف. والماتش الوحيد اللي فزنا فيه كويس كان قدام كوت ديفوار، والظروف خدمتنا فيه".
وأكمل مدحت العدل: "ملعبناش بأوراقنا كويس، وكنا بنلاعب مرتعشين وخايفين. والخلاصة، منتخب مصر أكبر من حسام حسن. الواحد حزين مش عشان طلعنا الرابع بس، لكن لأن دي مش صورة فريق ومنتخب مصر اللي بيدخل خايف من الفرق الأخرى".
-----
