هاجم المفكر خالد منتصر النجم تامر حسني بعدما ناشد الأخير وزارة الصحة والسكان بضرورة طرح فيديوهات استرشادية لتوضيح آليات اتباع النظام الصحي في تناول الطعام.
وكتب خالد منتصر عبر حسابه الرسمي بموقع التواصل الاجتماعي “فيسبوك”: يا عزيزي تامر ، الفنان العزيز، طبعاً انت مش عايز تقول انك مقتنع بنظام د ضياء العوضي فبتطرح حضرتك أسئلة ساذجة وبديهية، وده لإن فضيلة د ضياء لف لك الطب في سيلوفان ديني ، وحضرتك بقى لك فترة بتطلق تصريحات فيها كثير من الدروشة ، لا يوجد سؤال أكثر سذاجة من سؤال الأدوية لازم تتاخد.
وأضاف: يا سلام على عبقرية السؤال الثوري الرهيب، اللي محتاج د مجدي يعقوب يذاكر ويرد عليه ده عامل زي سؤال هي لازم الشمس تطلع، اللي كان بيقوله د ضياء يا أخ تامر اسمه في الطب ضلالات، والضلالات لا تناقش، ما تقوليش، ما تناقشه في إن الإنسولين مهم للمرضى أطفال السكر، وان عدم شرب المياه مفيد للكلى.
وتابع: لإن ده كأني باناقش واحد في عنبر الخطرين وعايزني أقنعه ، إن مش هو عبد الحليم حافظ، حيقتنع ازاي لو جبت له عبد الحليم نفسه مش حيقتنع، نيجي بقى للجزء بتاع هورمونات الفراخ، وحاقولها لحضرتك بلغة بسيطة وعامية زي ما أنت عايز، ما يقال عن ان الفراخ البيضا محقونة هورمونات عشان كده كبيرة عن البلدي، الكلام ده من قبيل الهرتلات والترهات ،
واستكمل: ليه عايز سيادتك تسأل عن سعر هورمون النمو اسمه growth hormone ، عشان الهورمون ده يحقنه صاحب المزرعه في كل فرخه عشان يكبرها محتاج ملايين الجنيهات، يعني الفرخه الواحده عشان يكسب تبقى بخمستلاف جنيه حضرتك.
واستطرد: حتقول لي لأ ، هو احنا عبط، دول بيضحكوا علينا ويحطوها في أكل الفراخ مش حقن، حاقول لك الهورمون ده بروتين بيتكسر في المعده وما يبقالوش فايده يا تامر يا عزيزي، أمال الفراخ دي كبيره ازاي. ، اشمعنى، حاقول لك من خلال نظرية التطور اللي السلفيين بيكرهوها.
وواصل: زي ما فيه انتخاب طبيعي في الحياة، فيه حاجة اسمها انتخاب صناعي، بيعمله البشر، وحضرتك بتحب الكلاب وعارف دور الانتخاب الصناعي وتحسين السلالات في الكلاب، اللي خلتهم عشرين الف شكل ولون، أهو خبراء الفراخ عملوا الانتخاب الصناعي ده، لغاية ما وصلوا لشكل الفرخة الكبيرة المليانة لحم دي.
وأشار: هي دي الحكاية ببساطة،يا ريت نبطل فتي وهبد ، وما نصنعش أصنام من عجوه ، وكل فنان عايز يقدم لنا نفسه كداعية ، يخليه في فنه ، ودي ما بيقعد مع دعاة كاجوال ، يحاول يفضي نفسه ساعه ويقرأ كتاب فؤاد زكريا التفكير العلمي،
واختتم: مستعد أبعته لحضرتك ولحد عندك البيت ، لكن اعذرني الأسئلة اللي انت بتسألها دي ، عيب شخص وفنان مؤثر زيك يسألها ، مكسوف تقول انك مقتنع بالطيبات ، كل نوتيلا وربع كيلو سكر وما تشربش ميه في هدوء ، وبعيد عن جمهورك اللي للأسف مش ناقص تشويه.
تامر حسني يناشد وزارة الصحة بطرح فيديوهات استرشادية لتوضيح آليات الطعام الصحي
وفي سياق متصل، ناشد ناشد النجم تامر حسني وزارة الصحة والسكان بضرورة طرح فيديوهات استرشادية لتوضيح آليات اتباع النظام الصحي في تناول الطعام.
وكتب تامر حسني عبر حسابه الرسمي بموقع التواصل الاجتماعي “فيسبوك”: في ظل الفتنة الغذائية اللي حاصلة في مصر وحديث كل الناس دلوقتي عن إيه المفيد لينا وإيه المضر هل ممكن أناشد وزارة الصحة المصرية وكبار الدكاترة المختصة وأصحاب المستشفيات بردود كافية فيها شرح مفصل عن إيه الأكل المفيد لينا وإيه اللي مش مفيد وياريت يكون شرح مفصل يفهمه الشخص العادي من غير أي مصطلحات طبية أجنبية
وأضاف: أولاً الخضار أمثال الخس والجرجير و ورق العنب وكل الورقيات مفيدة ولا لأ، وإزاي نطمن إنها مش مرشوشة مواد تمرض الناس، ثانياً البيض والفراخ اللي في بلدنا ناكله إزاي وإزاي نميز ونطمن إنه مش محقون وإزاي نعرفه لو محقون، ثالثاً شرب المية بكثرة كما تعلمنا مفيد ولا لأ، رابعاً الحليب مضر ولا كويس وإيه الصح اللي نشربه
وتابع: خامساً الأدوية لازم تتاخد ولا مش لازم ولا مش أي أدوية تتاخد أناشد وزارتنا المصرية تعملنا ڤيديوهات حد يطلع يكلمنا بالعامية ويرد بالتفصيل وبالأدلة العلمية على كل ده وياريت يساعدني صديقي المحترم الأستاذ الفاضل أيمن عباس بما إنه صاحب أكبر المستشفيات ياريت يطلعلنا دكاترة من عنده مختصة يعملوا ڤيديوهات ترد على كل اللي حاصل في مجتمعنا.
واستكمل: وبناشد برضو الدكتور العظيم مجدي يعقوب يدينا من خبرته العظيمة، والدكتور الكبير حسام موافي ويساعدونا الفترة دي كشعب ويريحونا من الجدل الفظيع ده، لأن محدش بقى عارف ياكل إيه ومياكلش إيه وثوابت كتير اتغيرت بين يوم وليلة، أرجوكوا متسيبوناش كده لا إحنا ولا ولادنا.
واختتم: وارجع وأقول محتاجين حد يكلمنا بطريقة بسيطة عامية يشرح فيها بالتفصيل وبالأدلة إيه غلط وإيه صح، وأنا ليه بقول محتاجين أكتر من جهة تتكلم، عشان كلنا نطابق الكلام ببعضه مع المنطق ونحكم صح، وشكراً.
اقرأ أيضاً في آفاق عربية
1
2
3
4
5
6
7
8
9
10
11
12
💬 كن أول من يعلق! وقول رأيك
شاركنا رأيك حول هذا المقال، وناقش مع الآخرين في التعليقات
لا توجد تعليقات بعد.
كن أول من يشارك برأيه!