انتقد المخرج عمرو سلامة تصرفات بعض الجمهور الغير متحضرة أثناء تواجدهم في السينمات.
وكتب عمرو سلامة عبر حسابه الرسمي بموقع التواصل الاجتماعي “فيسبوك”: تجربة دخول السينما بقت ساعات بتتحول لكابوس، في ظاهرة قذرة بتزيد بشكل واضح عدد من الناس اللي في قاعة السينما اللي عندهم قلة ذوق وقلة أدب وكلاحة وبجاحة إنهم مش محترمين باقي القاعة، ومستعدين يتكلموا ويهرجوا بصوت عالي أو عادي جدا يردوا على التليفون أو يفتحوه ويلعبوا ألعاب على الموبايل ونوره يضايق اللي حوليهم، والأقذر تلاقيه حاطط جزمته فوق دماغك كإنه قاعد في زريبة.
وأضاف: أنا زهقت من إحساس مشرف الرحلة اللي قاعد يقول للشاب ده الصوت بعد إذنك حضرتك، وللأستاذة ديه النور بعد إذنك جنابك وللحاجة ديه التليفون بعد إذن سعادتك وللشابة ديه ماتشلتيش في ظهر الكرسي بتاعي بعد إذن فخامتك، إمتى بقى في إنعدام للإحساس والإدراك إنك بتضايق واحد جنبك، وبتعكنن عليه وتبوظ تجربته اللي دافع فيها فلوس.
وتابع: والسؤال الأهم، ليه إنت دافع فلوس في دخول السينما وإنت مش مهتم تشوف الفيلم. ما تنزل تقعد في كافيه أو قهوة أو مطعم أو وفر فلوسك وأقعد في الليڤنج وأفتح فيلم بقى والعب على الموبايل براحتك واعمل تليفوناتك، وهرج مع صحابك وعلى صوتك وجعر براحتك.
واستكمل: لازم على إدارة السينمات تتعامل مع الموضوع ده بحزم أكثر، وتاخد إجراءات مع كل المزعجين وتطلب منهم تسيب السينما، لإن ناس كثير بقت مش عايزة تروح السينما، لإنها مش هتعرف تتفرج وتتفاعل مع الفيلم وده معناه حتميا إيرادات أقل وخسائر للسينمات نفسها.
واختتم: وللمزعجين أرحمونا يرحمكم الله، وعلى كل متضرر مايسكتش وياخد حقه وياخد موقف مع إدارة السينمات لحد ما نعرف نخش فيلم ونعرف فعلا نتفرج عليه.
ومن ناحبة أخرى، كان عمرو سلامة قد أشاد بالأمس بـ فيلم أسد بطولة محمد رمضان بعد حضوره العرض الخاص للفيلم، الذي اٌقيم أمس بإحدى السينمات، وكتب عبر حسابه الرسمي بموقع التواصل الاجتماعي “فيسبوك”: من غير ذرة انحياز، فيلم أسد فيلم كبير ومهم ومبهر، حسسني بفخر إن عندنا مواهب وعقول وموارد تقدر تعمل فيلم بالحجم ده والجودة دي.
اقرأ أيضاً في آفاق عربية
1
2
3
4
5
6
7
8
9
10
11
12
💬 كن أول من يعلق! وقول رأيك
شاركنا رأيك حول هذا المقال، وناقش مع الآخرين في التعليقات
لا توجد تعليقات بعد.
كن أول من يشارك برأيه!