باب ربنا دايمًا مفتوح .. حتى لو إنت بعيد
في لحظات بتحس إنك بعيد، وإن المسافة كبرت بينك وبين ربك، يمكن بسبب ذنب، أو تقصير، أو حتى تعب في القلب مش قادر تصيغ له دعاء، بس الأكيد إن الرجوع لربنا عمره ما كان محتاج خطوات مثالية.. ده محتاج نية حقيقية.
البداية مش لازم تكون مثالية
مش لازم ترجع وأنت حافظ، ولا وأنت بكامل طاقتك، ولا حتى بقلب مطمئن، الرجوع الحقيقي بيبدأ من لحظة صدق، مهما كانت بسيطة، دعاء همس، أو حتى دمعة نازلة من غير كلام، دي بداية تكفي، وربنا بيشوف النية قبل الفعل.
ممكن تبدأ بدعاء بصوت واطي، أو آية تقريها وتوقفي عندها
دعاء تقول فيه يا رب رجّعني، أو آية زي ﴿وَرَحْمَتِي وَسِعَتْ كُلَّ شَيْءٍ﴾، تقرأها كأنها بتطبطب عليك، ممكن تبقى لحظة من اللي تحس فيها إنك اتسمعت من غير ما تتكلم، وإن ربنا بيستناك بفرح، مش بلوم.
باب ربنا دايمًا مفتوح .. حتى لو إنت بعيد ربنا بيحب القلوب الراجعة حتى لو بتتعثر
مش شرط تبقى راجع ثابت، ممكن تبقى راجع وإنت بتقع كل شوية، وبتضعف، بس ربنا بيشوف الرجوع مش بالسُرعة ولا بالكمال، بيشوفه بالصدق، وكل خطوة فيها رجوع، حتى لو بطيئة، محسوبة عنده.
المهم ترجع.. حتى بخطوة واحدة
خد خطوة واحدة بس، حتى لو كانت إنك توقف وسط اليوم وتقول استغفرك يا رب ، أو تسيب حاجة صغيرة كنت بتعملها، أو تسجد سجدة فيها أنا راجع ، لأن الخطوة دي ممكن تكون مفتاح الرجوع كله.
ربنا دايمًا فاتح بابه، وإنت مش محتاج غير تفتحه من جواك.. خطوة واحدة، وهتلاقيه أقرب مما تتخيل. -----
