أمم أفريقيا قربت… والوزارة لسه في وضع “المنظرة”
مصر داخلة بطولة أمم أفريقيا في المغرب، والشارع كله عارف إن الموضوع مش هزار.
مش هنروح نعمل سياحة، ولا نتمشى في كازابلانكا ونرجع، إحنا رايحين نلعب بطولة قارية… بطولة تقيلة…
بطولة ما بتعرفش غير اللي جاهز، واللي وراه رجالة بتشتغل بجد مش بتتكلم.
وهنا بقى نخش في “الحتة الشقية” بتاعة الحقيقة اللي محدش بيقولها:
منتخب مصر مش مشكلته في الملعب بس… مشكلته في الإعداد، وفي الناس اللي المفروض تظبط الدنيا بدل ما تطلع تتكلم في الإعلام وتدي تصريحات على الفاضي.
الدكتور أشرف صبحي… وزير المنظرة بفرمان افاق عربية..
الراجل اللي ماسك الوزارة طول الوقت بيطلع يعمل شو إعلامي، ويطبطب، ويتصور، ويعمل مونولوجات عن “إحنا بندعم الرياضة المصرية”.
تمام… كلام حلو.
بس يا باشا… البطولة مش هتكسبها بـ “المنظرة”.
البطولة هتكسبها لما اللعيبة تبقى مركّزة، ولما المعسكر يبقى ثابت، ولما المشاكل تتحل من غير ما الجمهور يمسكها ويقلبها تريند في نص ساعة.
هاني أبو ريدة… الكبير قوي
رئيس اتحاد الكرة لازم يبقى موجود فعلًا… مش صورة في اجتماع ومكالمة مع مدرب.
المنتخب داخل على بطولة هتحدد شكل الكرة المصرية قدام أفريقيا كلها… فمينفعش نسمع إن فيه لعيبة مش عارفة سفرها إمتى، وفيه جهاز فني مش واخد صلاحيات كاملة، وفيه أزمات بسيطة بتتكبر لأنها متسيبة.
إحنا محتاجين شغل بضمير
مش محتاجين تصريحات
ولا محتاجين شد وجذب
ولا محتاجين حوارات “هنشوف” و”سنعمل” و”قريبًا”…
محتاجين:
– راحة نفسية للعيبة.
– استقرار فني، مش اجتماعات كل يومين.
– دعم حقيقي للجهاز الفني.
– تحضير تكتيكي محترم قبل البطولة.
– وحل كل المشاكل اللي محدش بيحب يعترف إنها موجودة.
والجمهور؟
ببساطة… صبره خلص.
الناس عايزة منتخب يخوّف، يلعب برجولة، ويفرحها… مش منتخب داخل كل بطولة وخارج منها بنفس الأسباب القديمة.
الخلاصة بقى:
لو الوزارة اشتغلت بجد… ولو صبحي ركّز بدل ما يجمّل… ولو هاني أبو ريدة مسك الملف بجد…
ساعتها هنشوف منتخب داخل البطولة وهيقول:
“إحنا هنا… وراجعن نكسب”.
بس لو نفس السيمفونية بتاعة الكلام والتصريحات؟
يبقى هنرجع من المغرب… ونكتب مقال جديد عنوانه:
“ليه بنعيد نفس الغلط؟”. -----
