📺 نجوي فؤاد تكتب عن تحية وساميةصورة أعتز بها جدا تجمعني مع عظيمتين من سابع المستحيلات أن يجود الزمن بأمثالهماتحية كاريوكا وسامية جمال، ملكات الرقص

🔸 نجوي فؤاد تكتب عن تحية وسامية

صورة أعتز بها جداً تجمعني مع عظيمتين من سابع المستحيلات أن يجود الزمن بأمثالهما…تحية كاريوكا وسامية جمال، ملكات الرقص الشرقي، أيقونات العصر الذهبي للفن المصري، الأستاذتين اللي تعملت منهما يعني إيه أخلاقيات المهنة وإن الفنان مسيرة مشرفة وسيرة حسنة. أقولكم إيه ولا إيه عن هاتين الأسطورتين، كرم الدنيا كله تجلى في هاتين السيدتين، كانتا مضرب مثل في الطيبة والجدعنة والشهامة والخير والعطاء غير المشروط، كانتا الإيد اللي بتطبطب وبتحتوي، الإيد اللي إمتدت بالخير لكل محتاج وقاصد وزائر، كانتا عنواناً للصدق والوضوح والصراحة والتصالح مع الذات. تحية كاريوكا كانت شخصية مالهاش زي بكل المقاييس. كانت خيرة للغاية، ونصيرة الغلابة والمظلومين، وكانت تحرص على الذهاب إلى مساجد آل البيت لتطعم الفقراء وكل حد محتاج. أما سامية جمال فكانت تتجلى فيها طيبة وحنية الدنيا كلها، راقية في مجلسها وكلامها وأسلوب حياتها، كانت زي النسمة، أرستقراطية في طباعها وأخلاقها، صانت زوجها رشدي أباظة وبيتها وربت إبنته قسمت أحسن تربية وكانت بتحبها وبتراعيها كأنها من صلبها. إنسانة مثقفة، عزيزة النفس ومعطاءة. لو قعدت أحكي عن ميزات كل واحدة منهما هحتاج مجلدات، لكن كل اللي أقدر أقوله أنو نتيجة كل الحسنات اللي عملوها في حياتهما، ربنا أكرمهما بأحسن خاتمة. ربنا يرحم توحة وسمسمة على قد ما أسعدونا بفنهما وأعمالهما اللي لسه عايشة لغاية يومنا هذا.
وحشوني وأنا أتعلمت منهما حاجات كتير وبعتبرهما أستاذتيّ اللي لطالما ألهموني بإنسانيتهم قبل فنهم.
ألف رحمة ونور وسلام على توحة وسامية