كم مرة شعرت بالرفض؟ ومين فينا مزعلش؟
الرفض تجربة مؤلمة تطرق بابنا جميعًا بلا استثناء، سواء كان في الحب، العمل، أو حتى في آرائنا وأفكارنا، كم مرة جلست تفكر وتعيد السؤال: «هل أنا فعلاً متحبش؟ هل أنا كفاية؟» هذه الأسئلة التي تراودنا بعد كل رفض تجعلنا نغوص في دوامة من الحزن والشك في أنفسنا، في هذا السياق، تشرح لنا الدكتورة أميرة سويلم، استشاري الصحة النفسية، لماذا يكون تقبل الرفض صعبًا جدًا على الإنسان، وكيف يمكننا التعامل معه بطريقة تحمي نفسيتنا وتعيد لنا قوتنا.
الرفض.. ألم كبير يوجع أكثر مما نتخيل
أوضحت الاستشاري أميرة إن الرفض مش بس كلمة، هو إحساس يمس جوهرنا كإنسان، لما نُرفض بنتألم فعلاً لأن ذلك يخلخل إحساسنا بالانتماء والقبول، وهما من أهم احتياجاتنا النفسية، وأضافت أن عقلنا يفسر الرفض أحيانًا كأنه هجوم على كياننا، مما يجعل الألم النفسي يوازي الألم الجسدي، وهذا تفسير ليه بنحس بوجع داخلي صعب تحمله، مؤكدة أن الأصعب لما تكون قيمتنا مربوطة بقبول الآخرين لنا، لأن وقتها الرفض بيشعرك إنك مش كفاية أو مش محبوب،كما أكدت أن في العلاقات، الرفض مش بس فقدان شخص، ده فقدان لحلم كبير بنيناه معاه، وعشان كده الألم بيكون عميق وبعيد عن الرفض السطحي.
كيف نحول الرفض من كابوس لقوة؟
أجابت الاستشاري النفسي ب ان الفرق بين الناس اللي بتقع بسبب الرفض واللي بتنهض أقوى منهم، بيبدأ من طريقة تفكيرهم، ووضحت إننا لازم نفصل بين نفسنا وبين الموقف اللي بيتم رفضه، مش كل رفض معناه إنك فاشل أو إنك مش محبوب، هو بس تجربة ما نجحتش، ولازم نشوفه كده، واستكملت حديثها قائلة “إن لما تدي لنفسك فرصة تحزن، تفهم مشاعرك وتركز على قيمتك الحقيقية اللي مش مرتبطة برأي شخص واحد، هتلاقي نفسك بتسترجع قوتك من جديد” وأكدت على أهمية الكلام عن المشاعر، سواء لصديق أو متخصص، لأنه مفتاح لفهم أعمق ونظرة أوضح، وشددت على أن الأهم إنك تحول الرفض لدافع للتعلم والنمو بدل ما يكون نقطة سوداء في حياتك تقف عندها.
الرفض في العلاقات الدعم.. لما تكون مش لوحدك اللعبة بتتغير
أوضحت سويلم أن وجود ناس حواليك بيحبونك ويتقبلونك على حقيقتك، هو أكبر قوة بتساعدك على مواجهة الرفض، واستكملت قائلة “إن الدعم الاجتماعي بيخلق لك ملجأ آمن، في المكان ده بتقدر تعبر عن نفسك بدون خوف، وتتقبل الألم بدون أحكام أو سخرية” وأضافت الاستشاري أن بالمقابل لما تكون في بيئة مليانة نقد مستمر وتوقعات تعجيزية، بيكون الرفض فيها أقسى وأصعب على النفس، وخلصت إلى أن لما تحس إنك مش لوحدك، بتقدر تتخطى الألم أسرع.
الرفض مش النهاية.. بل بداية جديدة
أكدت أميرة سويلم، استشاري الصحة النفسية، أن كل الناس اتعرضوا للرفض، حتى أنجح الناس، لكن الفارق الكبير إنهم ما خلوش الرفض يحددهم أو يوقفهم، وذكرت أن تقبل الرفض مش ضعف، ده قوة حقيقية بتتكون مع كل تجربة بتعديها، واختتمت حديثها قائلة “إن لما تتعامل مع الرفض كفرصة لبناء نفسك من جديد، هتلاقي إنك أقدر وأقوى، وأكثر ثقة بقدراتك وبنفسك”
-----
