بعد أول خناقة في العلاقة.. تعمل إيه وماتعملش إيه؟!
أول خناقة في أي علاقة بتكون لحظة فارقة، ساعات بنكبرها، وساعات بنتهرب منها، وساعات بنخسر فيها حاجة كان ممكن تكمل لو بس عرفنا نتصرف صح.
في اللحظة دي، أهم حاجة إنك تتكلم من غير ما تلوم، لأن اللوم بيقفل أي مساحة للحوار، وبيخلي الدفاعية تطغى على المشاعر، لو حسيت إنك عايز تقول “أنا آسف“، اسأل نفسك الأول.. بتقولها علشان فعلاً حاسس بالذنب؟ ولا علشان تهرب من المواجهة؟ لأن الاعتذار اللي بييجي علشان تقفل بيه الحوار مش بيحل حاجة، بل ساعات بيزود المسافة.
مهم كمان إنك توقف متابعة السوشيال ميديا شوية، لأن الاستغراق في المراقبة أو الاستفزاز بيغذي المشاعر السلبية، حاول تواجه الموقف بالحقيقة مش بالستوري، واتكلم حتى لو الكلام تقيل.
وما تشاركش كل حاجة بتحصل لأصحابك، مهما كانوا قريبين، لأن مشاعر العلاقة ما ينفعش تتحوّل لحوارات جماعية، وكل حد هيدي رأي ممكن يعقّد الموقف أكتر.
وفي وسط كل ده، خد لحظة واسأل نفسك.. هل الخلاف كان فعلاً على الموضوع؟ ولا أنت حسيت إنك اتهاجمت شخصياً؟ أوقات كتير الخلاف بيبقى على فكرة، بس بنتعامل معاه كإنه تهديد للعلاقة كلها.
الخناقات واردة، ويمكن تكون ضرورية، بس اللي بيفرق بين علاقة بتكمل وعلاقة بتتكسر، هو الطريقة اللي بنعالج بيها أول شرخ فيها.
فـ خد نفس، فكر، وافهم إن دي مش نهاية.. دي بداية النضج بينكم.
-----
