لو مش عارف تدعي.. قول بس "يا رب اللي في قلبي أنت عارفه"
في ناس لما تسمع عن فضل الدعاء في العشر الأوائل من ذي الحجة، بتحس بتقصير، مش علشان مش عايزة تدعي، بس علشان مش عارفة تبدأ منين، أو تقول إيه، أو تحس بكفاية في كلامها مع ربنا.
بس الحقيقة؟ ربنا مش بيقيسك بعدد الكلمات، ولا بجمالها.. هو بيشوف اللي جوّا القلب.
مش لازم تحفظ أدعية كتير.. كفاية تقول يا رب من قلبك
ساعات الدعاء بيبقى دمعة نازلة وانت ساكت، أو تنهيدة خارجة وانت موجوع، أو حتى بس ترفع عينيك للسما وتقول يا رب.. بس كده، من غير مقدمات، من غير ترتيب، لأن ربنا أقرب من كل ده، وسامع اللي حتى نفسك مش قادر تحكيه.
ابدأ بكلمة واحدة، والباقي هييجي لوحده
قول يا رب، وسبّح، واستغفر، وخلي لسانك طري بكلمة واحدة تحسها، مش تحفظها، ولو الدعاء وقّف منك، ربنا ما وقفش عن السمع، هو عارف إنك بتحاول، وعارف قد إيه نفسك تتكلم ومش عارف، فـ متتكسفش من صمتك.
لو مش عارف تدعي.. قول بس “يا رب اللي في قلبي أنت عارفه” العشر الأوائل فرصتك تمسك الباب وتفضل واقف عليهكل يوم من العشرة دول هو باب مفتوح، ونسمة من ربنا جاية مخصوص ليك، خُد بالك إن اللي بينك وبين الاستجابة مش مسافة.. ده بس نية صافية، وقلب راجع، وصوت بسيط بيقول أنا تعبان، بس راجعلك يا رب.
ربنا بيحبك لما ترجع حتى لو بكلمة واحدة
ماتستناش المناسبة الكاملة، ولا الجو الروحاني اللي يشجعك، ارجع بس، بوضوحك، بتعبك، بخوفك، بكل حاجة فيك.. وابدأ الدعاء حتى بكلمة اللهم بلّغني، أو اللهم طمّن قلبي، أو حتى اللهم أنت أعلم.
الدعاء مش فن في البلاغة، الدعاء حالة صدق.. وربنا بيحب الصادقين، مش المتقنين. -----
