أدلى المتهم بقتل مسن بالإسكندرية باعترافات تفصيلية أمام جهات التحقيق حيث قال "أناعندي 47 سنة... كنت بروح للمجني عليه بشكل مستمر، بحكم إنه راجل كبير في السن ومش قادر يتحرك بعد ما اتبترت رجله، وكنت بساعده في طلباته وبنزل معاه أقبض المعاش كل شهر.
عرفت كل تفاصيل حياته
مع الوقت عرفت كل تفاصيل حياته... إنه عايش لوحده ومعاه شوية فلوس بيصرف منهم. الفكرة بدأت تدخل دماغي إني أستغل وضعه وآخد الفلوس دي لنفسي.في يوم من أيام شهر رمضان، كنت عنده في الشقة زي العادة. حصل بيني وبينه كلام عادي، لكن أنا كنت ناوي أخلص الموضوع. فجأة ضربته بكوعي في صدره... الضربة كانت قوية، وقع بعدها على الأرض ومقامش تاني. ساعتها اتأكدت إنه مات.خفت واتوترت، بس فكرت بسرعة إزاي أخبي اللي حصل. شيلته وحطيته تحت السرير في أوضة النوم علشان محدش يشوفه. قفلت الشقة ومشيت كأن مفيش حاجة حصلت.بعد كده رجعت أخدت الفلوس اللي كانت معاه، وسرقت بعض متعلقاته وبعتها علشان أستفيد منها. فضلت الجثة في مكانها حوالي شهر، لحد ما الريحة بدأت تظهر والناس شكّت في الموضوع.مكنتش متخيل إن الموضوع هيوصل لكده... الطمع هو اللي خلاني أعمل كده، واستغليت ثقته فيا وضعفه... وأنا دلوقتي بندم على كل اللي حصل."
